Abdixhiku kritikon Qeverinë: Për mbi një vit qeverisje, s’ka realizuar asnjë projekt madhor – Lajmet e fundit

Kryetari i LDK-së, Lumir Abdixhiku ka kritikuar Qeverinë Kurti për mungesë investimesh kapitale, duke thënë se është investimi më i ulët në të gjithë dekadën e fundit.

Abdixhiku më tej ka pyetur se kur është parë kryeministri i Kosovës të përurojë ndonjë projekt madhor, vendpunishte, banesa apo të realizojë premtimin për ndërtimin e 40 çerdhve në Kosovë.

“Po kalon viti i dytë qeverisës, vera e dytë e kohës së punimeve, dhe asnjë projekt kapital nuk po merr formë në vendin tonë. As edhe një shenjë e lënë”, ka thënë ai.

Abdixhiku ka thënë se Kosova ka nevojë për zhvillim, por sipas tij ai nuk mund të reduktohet në disa transakcione bankare të skemave sociale.

“S’është ekonomia kaq e thjeshtë e shteti s’është vetëm bankë. Kosova megjithatë ka nevojë për projekte të guximshme dhe të mëdha; për investime kapitale në spitale, shkolla, infrastrukturë rrugore, stadiume, salla kulturore e në energji – në pothuajse çdo fushë të jetës publike”, shkroi ai në Facebook.

Ai më tej ka bërë disa krahasime me vendet e rajonit, duke thënë se Kosova duket e trisht krahasuar me tempon e punimeve në këto shtete.

“Fukarallëku mendor i kësaj Qeverie po prodhon tkurrje kolektive të gjithë shoqërisë sonë. Kosova sot duket e trishtë krahasuar me tempon e punimeve në secilin shtet në rajon. E në mungesë të projekteve kapitale, le të mjaftohemi me foto shëtitëse, arrogancë qeverisjeje e arsyetime të 20 viteve të shkuara. Është më e lehtë kjo”, shkroi ai ndër të tjera. /Zëri