Brukseli ende s’e di se kur do të takohen Kurti e Vuçiqi

Brukseli ende s’e di se kur do të takohen Kurti e Vuçiqi – Lajmet e fundit



Nga Brukseli nuk kanë konfirmuar se Kosova dhe Serbia do të takohen më 18 gusht në Bruksel.

Gjatë ditës së martë ishte presidenti i Serbisë, Aleksandar Vuçiq, i cili tha se do t’i përgjigjet pozitivisht ftesës së Brukselit që më 18 gusht të mbahet rundi i ri i dialogut me Kosovën, por tha se ai nuk e di “se për çfarë tjetër mund të flasim”.

Zëdhënësi i BE-së, Peter Stano, në një përgjigje për “Zërin” nuk e ka konfirmuar që kryeministri i Kosovës dhe presidenti i Serbisë do të takohen më 18 gusht.

“Nuk mund të konfirmoj asgjë, siç ka qenë edhe në të kaluarën, ne gjithmonë shpallim një takim në Bruksel nëse dhe kur është e nevojshme”, tha Stano për “Zeri.info”.

Ndërkohë, më 1 gusht presidenti serb Aleksandar Vuçiq dhe kryeministri i Kosovës, Albin Kurti pranuan ftesë nga shefi i diplomacisë së Bashkimit Evropian, Josep Borrell, për të vazhduar dialogun për të gjitha çështjet e hapura, por as këtu nuk u dha një datë.

Tentimi i BE-së për të takuar dy liderët vjen pas tensioneve të së dielës në veri, ku Kosova kishte paralajmëruar reciprocitet me dokumentet serbe në hyrje –dalje të Kosovës, por që Qeveria e ka shtyrë zbatimin e saj për 30 ditë me kërkesë të SHBA-së dhe BE-së. /Zëri