Djegia e hamulloreve dëmton tokën dhe ndotë mjedisin

Djegia e hamulloreve dëmton tokën dhe ndotë mjedisin – Lajmet e fundit



Dukuria e djegies së hamulloreve, pas korrjes së grurit, po vazhdon edhe këtë vit. Ekspertë të bujqësisë pohojnë se kjo praktikë është tejet e dëmshme, pasi dëmton florën, faunën. Po ashtu, ndikon edhe në zvogëlimin e produktivitetit të tokës dhe ndotjen e mjedisit.

Në nivel Kosove, këtë vit, besohet se ishin të mbjella me grurë rreth 66 mijë hektarë. E, pas fushatës së korrje-shirjes, si zakonisht, edhe këtë vit, në pjesë të ndryshme të vendit, bujq e jo vetëm, po ia vënë flakën hamulloreve. Sipas Agjencisë për Menaxhimin e Emergjencave, vetëm në Rajonin e Mitrovicës nga data 22 e deri më 26 korrik, kanë qenë 13 vatra të zjarreve fushore, të cilat janë menaxhuar nga njësia e zjarrfikësve dhe shpëtimit. Djegia e hamulloreve përveç se mund të rrezikojë jetën e njerëzve dhe pronat, është e dëmshëm edhe për tokën dhe botën shtazore, tha profesor Shukri Fetahu.

 “Kashta dhe mbetjet që mbesin pas korrjes së grurit ka mikroorganizma të dobishëm dhe me rastin kur ndizen hamulloret, digjet biomasa që mbetet, por edhe çdo gjë që është e gjallë në tokë. Kështu, materia që do të kthehej në materie ushqyese digjet edhe humbet. Kjo e varfëron dhe zvogëlon pjellorinë e tokës”, tha ai.

Tutje, profesori i bujqësisë thotë se djegia e hamulloreve është veprim që përsëritet ndër vite. Fetahu shton se bujqit, duke menduar se po i bëjnë mirë tokës, po e varfërojnë atë dhe ndotin edhe mjedisin.

 “Kur digjet biomasa krijohet sasi enorme e dyoksid karbonit, që ndikon në klimën në nivel lokal ose regjional. Prandaj, në asnjë mënyrë fermerët nuk duhet të djegin hamulloret, por edhe organet e shtetit nuk duhet t’i lejojnë bujqit që t’i djegin hamulloret, sepse kështu shkatërrohet fauna e dheut, mikroorganizmat dhe digjet biomasa e cila do të shndërrohej në materie ushqyese për bimën e ardhshme dhe ndotmi mjedisin”, tha Fetahu për Radio Kosovën.

Profesori Fetahu tregon se marrë parasysh dëmet që i shkaktohen tokës dhe mjedisit, djegia e hamulloreve është e ndaluar dhe ndëshkuar në shumë shtete të botës. Zjarrvënia e qëllimshme është e ndaluar dhe ndëshkohet penalisht edhe në Kosovë.

Qytetarët që në këto ditë vere shohin zjarre në fusha a male ose ballafaqohen me to në pronat e tyre, mund të raportojnë në numrin 112.