Home
Gara për “Luanin e Artë” me 23 filma

Gara për “Luanin e Artë” me 23 filma

Prej aktoreve Penelope Cruz e Cate Blanchett deri te regjisorët Darren Aronofsky, Alejandro Inarritu e Luce Guadagnino, edicioni i sivjetëm i Festivalit të Filmit në Venecie, i 79-ti me radhë, që mbahet prej 31 gushtit deri më 10 shtator, do të jetë nikoqir i yjeve të shumtë të filmit. Në garë për çmimin prestigjioz, “Luani i Artë” për filmin më të mirë, janë 23 filma, raportojnë mediat e huaja.

Edicioni këtij viti, është konceptuar si “dritare e hapur ndaj botës”, ka thënë në një video-prezantim, Alberto Barbera, drejtori artistik i Festivalit, duke e dënuar me këtë rast arrestimin e tre regjisorëve në Iran.

Filmi i njërit prej tyre, Jafar Panahit – i cili duhet t’i bëjë gjashtë vjet burg për “propagandën kundër regjimit” – do të jetë në konkurrencë. Titulli i filmit është “Kherst Nistu” (Arinjtë nuk ekzistojnë).

Franca përfaqësohet fuqishëm sivjet me pesë filma në konkurrencë. Në listë janë “Les Enfants des Autres” (Fëmijët e të tjerëve) i Rebecca Zlotowskit me Virginie Efiran në rol kryesor, “Un Couple” (Çifti) i Frederick Wiseman, “Les Miens” i Roschdy Zem, “Athena” i Romain Gavrasit dhe “Saint Omer” (Omeri i shenjtë) i Alice Diopit, i pari film për vrasjet e foshnjave.

Regjisori e skenaristi francez Florian Zeller ua ka besuar rolet në filmin e tij “Le Fils” (I biri) aktorëve Hugh Jackman, Laura Dern dhe Anthony Hopkinsit.

As sivjet, në tepihun e kuq në Lido nuk do të mungojnë yjet. Aty do të jenë aktorja spanjolle Penelope Cruz, protagoniste e filmit italian “The Immensity” të Emanuele Crialeses, përderisa australiania Cate Blanchett, luan rolin e dirigjentes në filmin “TAR” të Todd Fieldit.

Edicionin e sivjetëm do ta freskojë edhe rikthimi i Darren Aronofskyt me filmin “The Whale” (Balena) me Brendan Fraserin në kryerol.

Edhe një emër i shquar regjisori, është meksikani Alejandro Inarritu, i cili në Venecie prezantohet me “një film fort personal”, siç e ka prezantuar Barbera: “Bardo, kronika e rrejshme e disa të vërtetave”

Shumë i prituri “Bones and All” i italianit Luce Guadagnini, ka kastë hollywoodiane prej Timothé Chalamet deri te Chloe Sevigny.

Britanikja Tilda Swinton luan në filmin “The Eternal Daughter” të Joanne Hoggut, e Colin Farrell është aktori kryesor në filmin e Martina McDonagh, “The Banshees of Inisherin”. Pa dyshim, vëmendje pritet të tërheqë edhe “Blonde” i Andrew Dominikut, një rrëfim për Marilyn Monroe me Ana de Armas në kryerol dhe Adrien Brody. Filmit “White Noise” të Noah Baumbach me Adam Driver dhe Greta Gerwig, do ta ketë nderin ta hapë garën.

© KOHA. Të gjitha të drejtat janë të rezervuara.