KEK-u më 2020-n, prodhim rekord të energjisë elektrike që nga fillimi i operimit në vitin 1962 – Lajmet e fundit

Korporata Energjetike e Kosovës, gjatë vitit 2020, ka tejkaluar planifikimet e prodhimit për 6% më shumë se në vitin paraprak.

Sukses më shumë se në vitin 2019 kanë treguar “Kosova A” dhe “Kosova B”.

Njoftohet se pavarësisht situatës së krijuar si pasojë e pandemisë, KEK-u në vitin 2020 ka arritur rekordin e prodhimit të energjisë elektrike që nga fillimi i operimit në vitin 1962

Përmes një komunikate për medie, KEK-u ka theksuar se edhe përkundër stabilimenteve të vjetra, situatës me pandemi gjatë 2020-ës, “suksesi i arritur ka tejkaluar të gjitha pritjet e planifikuara”.

“Vitin 2020 Korporata Energjetike e Kosovës e ka përmbyllur me shumë sukses, duke tejkaluar të gjitha pritjet e planifikuara. Këtë vit termocentrali ‘Kosova A’ ka tejkaluar planifikimet e prodhimit me 118% ose 6% më mirë se vitin paraprak. Ndërsa ‘Kosova B’ ka tejkaluar planifikimet e prodhimit me 106,1% ose 6,4% më mirë se vitin paraprak. Edhe Divizioni i Prodhimit të Qymyrit ka arritur me sukses të furnizojë dy termocentralet për të prodhuar rrymë për qytetarët e vendit me këtë produkt esencial”, thuhet në komunikatë.

Përmes kësaj komunikate theksohet se KEK-u, po ashtu gjatë 2020-s ka arritur me sukses të furnizojë edhe Termokosin me energji termike, e cila shërben për ngrohjen e qytetarëve të kryeqytetit. /Zëri