Kolona të gjata në kufij, pritje deri në dy orë – Lajmet e fundit

Pas qëndrimit në pushimet e verës, shumë mërgimtarë nga mëngjesi kishin mësyrë vendet perëndimore.

Gjatë kalimit nga Kosova për në shtetin fqinj Serbi, ata janë përballur sërish me kolona të gjata, dhe pritje deri në 2 orë. Në kufirin e Merdarit, vetëm gjatë mesditës kolona ishte deri në qindra metra. Pritje për kalimin dhe hyrjet në Kosova ka pasur edhe në pikëkalimet e tjera.

Kolona të gjata janë kthyer sërish nëpër pikëkalimet kufitare ndërmjet Kosovës dhe Serbisë, duke bërë kështu që bashkatdhetarët që ia kishin mësyrë vendeve perëndimore, të presin me orë të tëra në pikëkalimin kufitar të Merdarit, ata thonë se pritja këtu në këto temperature, është e mundimshme. Për shumë nga bashkatdhetarët që kishin mësyrë vendeve të tyre të punës, kalimi i kufijve është bërë shumë i mundimshëm, pasi po presin me orë të tëra edhe në kufijtë e tjerë.

“Isha në Kosovë, po kthehem për në Gjermani. Shumë pritje e gjatë, unë që një orë kam ardhur këtu, dhe deri sa t’i afrohem afër kufirit, i kam diku edhe një orë. Është shumë shqetësuese sepse po humbet edhe vullneti i udhëtimit”, ka theksuar Hysni Jashari, bashkatdhetar.

“Jam duke shkuar për Gjermani, që një orë jam duke pritur, ngadalë po ecën. Por, unë jam vetë, jemi mësuar të presim, por ata që janë me fëmijë e kanë më të vështirë”, u shpreh bashkatdhetari tjetër Ibrahim Surdulli.

Edhe Ramadan Nosha theksoi se po hasin pritje të gjata edhe nëpër kufijtë e tjerë. “Edhe në kufirin tjetër që do ta kalojmë tash, duhet me prit deri pesë orë, e për pesë orë mundesh të ecësh gjatë. Të hënën duhet me punu kur të shkojmë”, ka theksuar ai për televizionin publik.

Sipas Qendrës Kombëtare për Menaxhimin Kufitar, në pikë kalimin kufitar në Merdar pritjet në mëngjes, ishin 50 minuta, ndërsa radha e automjeteve është një kilometër, në pikë kalimin kufitar në Muçibabë pritjet në dalje arrinin deri në një orë ndërsa radha e automjeteve është 800 metra. Edhe në pikë kalimin kufitar Dheu i Bardhë, në dalje pritjet janë gjithashtu 50 minuta, ndërsa radha e kolonave ishte deri në 350 metra.