Kosovari rrëfen në gjyq skemën e punësimeve të rrejshme në Itali – Lajmet e fundit

Në Itali, gjegjësisht në qytetin Padua, është mbajtur një gjykim në lidhje me punësimet e rrejshme të kosovarëve atje.

Një kosovar u paraqit në gjykatë për të treguar mënyrat deri te marrja e kontratave dhe marrja e lejeve të qëndrimit në Itali.

Siç raporton “Mattinopadova”, punëkërkuesit kosovarë paguajnë 400 euro për çdo kontratë të rrejshme punësimi, por kjo nuk mjafton për të marrë lejen e qëndrimit. Një kusht tjetër qenësor është deklarimi i pagës.

E për t’i blerë këto deklarime ata duhet të paguajnë edhe nga 50 euro në muaj.

Me fjalë tjera, me këto pagesa ju mund të bëheni “i rregullt” në Itali.

LEXOJENI EDHE KËTË

“LA STAMPA” SHKRUAN PËR SKLLAVËRIMIN E KOSOVARËVE MINORENË NË ITALI

Ky mekanizëm u sqarua të enjten e kaluar në një gjykatë në Padoa nga një imigrant kosovar, i cili në këtë mënyrë e ka “legalizuar” prezencën e tij në Itali duke iu falënderuar – në këmbim të një pagese – Umberto Antonio Tirantit, një 73-vjeçar i lindur në Torino, por me banim në Padua, i cili prapa vetes ka një sërë rastesh të mashtrimeve dhe Liliana Mandachi, 64-vjeçarja rumune që jeton në Arcella dhe është e kërkuar nga autoritetet e vendlindjes së saj për vite të tëra: të dy janë thirrur për të dhënë llogari për veprat penale që kanë për qëllim financimin e imigracionit të paligjshëm, mashtrim dhe për dokumente të rreme.

Një person tjetër, me origjinë nga Maroku dhe “përfitues” i lejeve të rrejshme të qëndrimit, u mor në pyetje.

Ngjarjet raportohet të kenë ndodhur nga viti 2016 deri më 2018-n dhe, sipas medias italiane “Mattinopadova”, ka gjasa që asnjë prej të dyshuarve të mos ndiqet penalisht. Madje, mediumi shkruan se do të jetë e pamundshme, e ndoshta edhe e padrejtë, të ndiqen penalisht ata që tashmë kanë gjetur punë dhe kanë bërë edhe bashkim familjar.

Dëmi, sipas mediumit italian, që i është shkaktuar INPS-së (instituti kryesor i sistemit publik italian të pensionimit) mund të llogaritet në rreth 100 mijë euro: Tiranti ishte përfaqësues ligjor i një sërë kompanish, të gjitha të zbrazëta për të “punësuar” punëtorë të rremë dhe për të krijuar një raport për kontribute të rreme.

Gjykimi do të vazhdojë më 28 maj. /Zëri