Kurti takohet me ambasadorin e Italisë, bëjnë thirrje për kujdes në mbrojtje nga infektimi me COVID-19

Kurti takohet me ambasadorin e Italisë, bëjnë thirrje për kujdes në mbrojtje nga infektimi me COVID-19 – Lajmet e fundit



Kryeministri në detyrë, Albin Kurti, ka zhvilluar një takim sot me ambasadorin e Italisë në Kosovë, Nicola Orlando, të cilët kanë diskutuar në lidhje me periudhën me virusin COVID-19.

Me këtë rast, Orlando ka bërë thirrje që të respektohen masat nga qeveria po ashtu edhe udhëzimet nga ana e ekspertëve, përcjell “Zëri.info”.

Me këtë rast edhe Kurti ka bërë thirrje që qytetarët të respektojnë masat, ndërsa e ka njoftuar ambasadorin në lidhje me hapat e mëtejmë për këtë çështje.

“Kryeministri në detyrë Kurti, e njoftoi Ambasadorin Orlando rreth hartimit të një fushate vetëdijësuese për COVID-19. Informimi rreth përhapjes, formave të parandalimit të përhapjes, dhe pasojave të virusit nuk është asnjëherë i mjaftueshëm”, thuhet në njoftimin e Qeverisë në detyrë.

Tutje, kreu në detyrë i Qeverisë gjithashtu foli edhe për kujdesin që Qeveria ka treguar ndaj shëndetit të ekonomisë, përpos atij publik.

“Pas hartimit dhe zbatimit të Pakos Emergjente Fiskale, Qeveria e Republikës së Kosovës ka filluar diskutimin gjithëpërfshirës për hartimin e pakos së dytë, atë të rimëkëmbjes se ekonomisë”, thuhet në komunikatë.

Kurti edhe në këtë takim e ka përmendur menaxhimin e mirë të situatës me virusin COVID-19 nga ana e qeverisë të cilën ai udhëheq.

“Fakti se kemi bërë menaxhim të mirë deri sot dhe kemi shënuar fitore në beteja nuk duhet të na shpërqendrojë nga objektivi për të fituar luftën kundër virusit. Vëmendja duhet të vazhdojë të jetë e lartë aq sa edhe përgjegjësia e të gjithëve për aq kohë sa virusi është në mesin tonë“, ka thënë Kurti. /Zëri.info