Mehaj për situatën në veri: Serbia “e përkdhelura” e BE-së – Lajmet e fundit

Ministri i Mbrojtjes, Armend Mehaj ka reaguar pas tensioneve në veri të vendit, si dhe kërkesës së Bashkimit Evropian dhe SHBA-së për shtyerje të reciprocitetit me Serbinë.

Mehaj ka thënë se BE-ja po e përkdhel Serbinë, pavarësisht qasjes destruktive të saj, shkruan Zeri.info.

Ai më tej u shpreh se politikat konfuze të zgjerimit, bllokimi i zgjerimit të BE-së kanë krijuar terren të përshtatshëm për ringjalljen e forcave ultranacionaliste agresive në Kosovë, Mal të Zi e Bonje.

“Këto forca, për fat të keq, në pushtet të pandërprerë, dihet edhe nga çdo autoritet i BE-së, se janë të mbështetura nga Rusia përmes Serbisë. të cilat mbajnë edhe pas kaq vitesh atmosferën e konflikteve potenciale duke krijuar rrezik të madh për sigurinë e vendeve përkatëse dhe rajonit në përgjithësi, siç është edhe rasti I fundit në pjesën veriore të vendit tonë”, ka thënë Mehaj.

Ministri Mehaj më tej tha se BE-ja kërkon përmbushjen e shumë kritereve nga vendet me orientim propërendimor, të cilat synojnë stabilitetin në rajon, kurse pavarësisht veprimeve të Serbisë, BE-ja mbështet atë.

“Kosova në momentumin e ri ka rrethanën më specifike prandaj edhe strategjia e qasjes mbi këtë realitet kërkon qasje të analizuar dhe vlerësuar mirë dhe me kujdes të shtuar.

Derisa Serbia edhe pas situatës së krijuar në Ukrainë, vazhdon të mbetet zgjatim i Rusisë në Ballkan, dhe para këtij fakti BE, vazhdon të flirtoj, pa qëndrim të qartë ndaj Serbisë, epilogu i procesit të dialogut Kosovë-Serbi do të mbetet i paqartë.

Dështimi i Serbisë për të dënuar me forcë agresionin e zhveshur të Rusisë kundër Ukrainës e vë atë në kundërshtim të fortë me vlerat evropiane.

Dështimi i Serbisë për t’iu bashkuar sanksioneve evropiane kundër Rusisë ofron mbështetje ekonomike dhe politike për Rusinë, përsëri, në kontrast të fortë me politikën e BE-së”, shkroi ai ndër të tjera. /Zëri