Mehaj prindërve të ushtarëve të rinj: Faleminderit që edukuat e rritët vajza dhe djem fisnikë

Mehaj prindërve të ushtarëve të rinj: Faleminderit që edukuat e rritët vajza dhe djem fisnikë – Lajmet e fundit



Ushtrisë së Kosovës sot i janë shtuar edhe 251 ushtarë të rinj, gjatë një ceremonie të betimit të mbajtur në kazermën e Komandës dhe Doktrinës të FSK-së në Ferizaj.

Me këtë rast, ministri i Mbrojtjes, Armend Mehaj, tha se për të është kënaqësi që brenda një viti, FSK-së i janë shtuar mbi 1000 ushtarë.

Kjo rritje, sipas tij, do të vazhdojë pasi që pas 9 javësh, ai tha se do të diplomojnë edhe mbi 300 rekrutë, ndërsa në muajin shtator do të shpallim konkursin e ri për 612 ushtarë aktivë dhe 367 rezervë.

“Për ta mbrojtur vendin tonë dhe për të siguruar paqen, ne na duhen personel i përgatitur dhe me pajisje moderne, për këto do të punojmë fort dhe pa u ndalur”, theksoi Mehaj.

Ndër të tjera, Mehaj tha se Ushtria Çlirimtare e Kosovës është dhe do të mbetet gjithnjë krenaria jonë kombëtare, “është ajo që ëndrrën për liri na e bëri realitet, është ajo që jeton brenda nesh”.

“Ne jemi të qëndrueshëm e të pathyeshëm si Adem Demaçi dhe jemi trima si Adem Jashari. Dy Adema na udhëheqin neve, njëri në aspektin politik, tjetri në aspektin ushtarak. Të dy bashkë do të mbesin prijësit tanë të përjetshëm”, u shpreh ministri i Mbrojtjes.

Ai pati edhe disa fjalë për rekrutët e rinj, duke u thënë se do të përballen me vështirësi, me pengesa e me rreziqe, “jetët tona edhe mund të shuhen, por atdheu dhe populli ynë nuk do të shuhet kurrë”.

“Rruga drejt suksesit është e pamundur pa aleatët tanë, pa SHBA-në dhe NATO-n, ne do të kultivojmë gjithmonë raporte të shëndosha, të ndërtuara mbi bazën e sinqeritetit dhe besimit reciprok, sepse mbi të gjitha besimi ndërton aleanca të pathyeshme. Për besimin, për BESËN, jemi të njohur ndër shekuj si popull. Vizioni, misioni dhe amaneti ynë është anëtarësimi i Kosovës në NATO”, tha më tej Mehaj.

Ministri i Mbrojtjes, FSK-së iu referua si “ushtri e të gjithë qytetarëve të Republikës së Kosovës”, e cila tha se është e aftë dhe e gatshme që, përkrah partnerëve, të jetë protagonist në ruajtjen e paqes dhe sigurisë në vend, rajon dhe më gjerë.

Në fund, ai iu drejtua prindërve të rekrutëve të rinj: “Të dashur prindër, sidomos ju të dashura nëna, faleminderit që edukuat e rritet vajza dhe djem fisnikë. Për sa kohë që kultivojmë gjenerata të tilla, vendi ynë do të frymojë lirshëm. Faleminderit, urime e shumë suksese”. /Zëri