Ndalohet në Kosovë gazetarja spiune ruse [foto] – Lajmet e fundit

Sot gjatë ditës së shtunë, në pikën kufitare në veri të Kosovës, është ndaluar Daria Aslamova ndaj të cilës shumë shtete kanë vertëtuar se ka qenë e angazhuar në spiunazh për Rusinë.

Këtë e ka bërë të ditur ministri i Brendshëm, Xhelal Sveçla përmes një postimi në Facebook, ku thuhet se nën petkun e gazetarës ajo ka marrë pjesë edhe në luftimet në Ukrainë duke propaganduar.

“Sot, në pikë kalimin kufitar në veri të vendit është ndaluar Daria Aslamova. Shumë shtete e kanë vërtetuar se ajo ka qenë e angazhuar në spiunazh për inteligjencën ushtarake ruse dhe se ka vepruar në petkun e gazetares. E njëjta ka marrë pjesë edhe në luftimet në Ukrainë duke propaganduar mbi pushtimin rus ndaj Ukrainës”, shkroi Sveçla.

“Me këtë rast, ajo është ndaluar dhe po vazhdon angazhimi i akterëve përkatës deri në zbardhje të qëllimeve të saj”, tha më tej Sveçla.

Ministri thotë se tentimi i Aslamovës për të hyrë në Kosovë përkon me zhvillimet në veri të vendit dhe dëshmon lidhjet me propagandën ruse.

“Theksojmë faktin se ajo tenton të hyjë në Republikën e Kosovës një javë pas tensioneve të shkaktuara nga strukturat kriminale në veri të vendit dhe në të njejtën ditë kur të njejtat struktura që orkestrohen nga Vuçiqi kanë shtënë rreth 10 herë drejt zyrtarëve tanë policor. Tentimi i saj për të hyrë në vendin tonë përveç që përkon me zhvillimet në veri të vendit, i dëshmon qartë lidhjet dhe propagandën ruse të cilës i është bashkuar tashmë Serbia dhe që kanë për qëllim destabilizimin e vendit tone”, u shpreh ministri Sveçla. /Zëri