Nitaj: “Trepça” duhet të qëndrojë në këmbët e veta dhe jo të jetë barrë e shtetit – Lajmet e fundit

Ministri në detyrë i Ekonomisë, Muharrem Nitaj së bashku me kryeministrin në detyrë, Avdullah Hoti, sot kanë vizituar ndërmarrjen “Trepça”, ku janë takuar me Bordin dhe menaxhmentin e ndërmarrjes.

Në njoftimin e dërguar për media theksohet se ata u njoftuan nga menaxhmenti për gjendjen aktuale dhe problemet me të cilat po përballet Trepça.

Hoti dhe Nitaj kërkuan nga menaxhmenti i “Trepçës” që të hartojnë një plan të detajuar biznesi për ta kapërcyer krizën dhe premtuan se Ministria e Ekonomisë dhe Ambientit do të shohë të gjitha mundësitë e mundshme që ta mbështes Trepçën në kapërcimin e situatës së krijuar nga borxhet e akumuluara, që janë grumbulluar ndër vite.

Nitaj nga ana e tij tha se “Trepça” duhet që brenda një afati të shkurtër të shndërrohet në një ndërmarrje profitabile dhe të mos jetë më barrë e Ministrisë.

“Trepça nuk është në ditët e saja më të mira. Në dy tre muajt e fundit ka pasur lëvizje pozitive, për të parën herë ka arritur që me të hyrat e veta t’i sigurojë pagat e punëtorëve, mirë po kjo nuk është e mjaftueshme, Trepça duhet t’i gjejë mundësitë që të qëndrojë në këmbët e veta dhe jo të jetë barrë e shtetit”, citohet të ketë thënë Nitaj. /Zëri