Pas 22 vitesh grupi i famshëm ribashkohet për inaugurimin e Joe Biden

Grupi i famshëm “New Radicals” do të ribashkohen për herë të parë në 22 vjet për të interpretuar “You Get What You Give” si pjesë e ngjarjes virtuale të administratës Biden-Harris, “Parade Across America”, njofton Rolling Stones, transmeton Insajderi.

“Nëse ka një gjë në Tokë që mund të na bëjë të mbledhim grupin së bashku, qoftë edhe për një ditë, është shpresa që kënga jonë të jetë edhe feneri më i vogël i dritës në një kohë kaq të errët”, tha frontmeni Gregg Alexander në një deklaratë.

“Amerika e beson me zemër se gjërat do të ndriçohen përsëri me një administratë të re dhe një plan të vërtetë për vaksinat gjatë rrugës. Ky është mesazhi i këngës … kjo botë do t’ia dalë mbanë”.

Kënga hit gjithashtu ka një lidhje të thellë me familjen Biden: Në autobiografinë e Joe Biden të vitit 2017, “Promise me, dad”, ai shkroi se “You Get What You Give” u bë kënga e familjes teksa djali Beau Biden po luftonte me kancerin.

“Gjatë mëngjesit, Beau shpesh më bënte të dëgjoja atë që mendoja se ishte kënga e tij e tij e preferuar,” You Get What You Give” nga New Radicals”, shkroi Biden.

“Edhe pse Beau kurrë nuk pushoi së luftuari dhe vullneti i tij për të jetuar ishte i fortë – mendoj se ai e dinte që kjo ditë mund të vinte. Fjalët e këngës janë: ‘E gjithë kjo botë e mallkuar mund të shkatërrohet. Do të jesh mirë, ndiq zemrën tënde’”.

Performanca e ribashkimit vetëm për një ditë – koncerti i parë i bendit së bashku që nga viti 1999; ata u ndanë vetëm disa muaj pas publikimit të “You Get What You Give” – do të shërbejë si akti përmbyllës në paradën virtuale të inaugurimit, e cila do të zhvillohet pas ceremonisë së betimit në 20 Janar. /Insajderi.com