Policia vendos nën sekuestro pasuritë e biznesmenit të dëbuar nga Italia, kapin vlerën e rreth 3 milionë eurove

Policia vendos nën sekuestro pasuritë e biznesmenit të dëbuar nga Italia, kapin vlerën e rreth 3 milionë eurove

Në një njoftim zyrtar, Policia e Shtetit ka lajmëruar se ka vendosur nën sekuestro pasuritë e biznesmenit të dëbuar nga Italia, G. S, të vëllait të tij, S. S., si dhe të shtetasit R. K.

Sipas uniformave blu, janë vënë në sekuestro preventive disa prona që kapin vlerën rreth 3 milionë euro, dhe që dyshohet se janë përfituar nga veprimtaria kriminale e shtetasit G. S. Policia thekson se “Shtetasi ka kryer veprimtari kriminale dhe është dënuar në shtetin italian nga viti 1999 – 2008”.

Njoftimi:

Vendoset sekuestro preventive mbi disa prona që kapin vlerën rreth 3 milionë euro, në pronësi të dy vëllezërve dhe të një shtetasi tjetër. Në vijim të punës për identifikimin, gjurmimin, gjetjen dhe sekuestrimin e pasurive që rrjedhin nga veprimtaria kriminale në fushën e pastrimit të parave, pas një pune të mirëfilltë hetimore dhe profesionale të kryer nga Njësia për Hetimin e Krimit Ekonomik e Financiar në Drejtorinë Hetimore në Departamentin e Policisë Kriminale, në bashkëpunim të ngushtë me Prokurorinë e Rrethit Gjyqësor Durrës, u bë i mundur finalizimi i hetimeve 3-vjeçare në ngarkim të dy vëllezërve dhe të një shtetasi tjetër, me të cilin dy vëllezërit kanë lidhje shoqërore. Si rezultat i hetimeve të kryera dhe provave të grumbulluara, Gjykata e Rrethit Gjyqësor Durrës vendosi sekuestron preventive për pronat e shtetasve G.S, S. S. dhe R. K., banues në Durrës, konkretisht:

– Sekuestro 100% të aksioneve të shoqërisë me aktivitet “Import, eksport, tregti autoveturash, kamionësh etj”, me seli në Durrës,

– 2 apartamente, në Durrës;

– 20.600 m2 sipërfaqe toke arë, në Durrës,

– 1000 m2 sipërfaqe toke truall, mbi të cilën janë ndërtuar 2 banesa me sipërfaqe 140 m2 secila, në Durrës,

– Një godinë banimi dykatëshe dhe 2 apartamente banimi, në Durrës,

13 automjete të markave të ndryshme në pronësi të shoqërisë tregtare

Vazhdon puna nga Njësia e Hetimit të Krimit Ekonomik e Financiar, për identifikimin e pasurive të tjera të këtyre personave dhe lidhjeve të tyre familjare dhe shoqërore. Shtetasi G. S ka kryer veprimtari kriminale dhe është dënuar në shtetin italian nga viti 1999 – 2008.

Njësia për Hetimin e Krimit Ekonomik në Drejtorinë Hetimore në Departamentin e Policisë Kriminale, në bashkëpunim me Prokurorinë e Rrethit Gjyqësor Durrës, në vitin 2018, nisur nga disa transferta të dyshimta bankare të shtetasve të sipërpërmendur, ka filluar hetimin për veprën penale “Pastrimi i produkteve të veprës penale ose të veprimtarisë kriminale”. Materialet për ekzekutimin e Vendimit të Gjykatës iu dërguan Prokurorisë pranë Gjykatës së Shkallës së Parë Durrës.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.