Reagon Osmani pas sulmit seksual ndaj të miturës: Është koha të edukojmë djemtë tanë

Reagon Osmani pas sulmit seksual ndaj të miturës: Është koha të edukojmë djemtë tanë – Lajmet e fundit



Pas raportimeve për sulmin seksual ndaj një nxënëse në shkollën “Faik Konica” në Prishtinë, ka reaguar edhe presidentja e vendit, Vjosa Osmani.

Përmes një postimi në Facebook, Osmani ka thënë se është koha të edukohen djemtë e të trajtojnë motrat e shoqet e klasës së tyre si të barabarta.

“Është koha e fundit të luftojmë mendësinë ku vajzat vazhdimisht ngacmohen e rriten me idenë që duhet të mbrohen, të kenë kujdes, e të privohen. Tani, si kurrë më parë, është koha të edukojmë djemtë tanë të trajtojnë motrat e shoqet e tyre të klasës si të barabarta me ta, e me respektin dhe dashurinë që ato e meritojnë”, ka shkruar ajo.

Shefja e shtetit ka thënë se është takuar me ministrin e Punëve të Brendshme, Xhelal Sveçlën dhe ministren e Arsimit, Arbërie Nagavci, të cilët kanë premtuar se po e trajtojnë çështjen me seriozitet./Zëri

Postimi i plotë:

Nuk është vetëm një rast i izoluar i ngacmimit seksual! Fatkeqësisht, është një pasqyrë e trishtë e një situate të rëndë në shoqërinë tonë.

Prindër të dashur,

Është koha e fundit të luftojmë mendësinë ku vajzat vazhdimisht ngacmohen e rriten me idenë që duhet të mbrohen, të kenë kujdes, e të privohen. Tani, si kurrë më parë, është koha të edukojmë djemtë tanë të trajtojnë motrat e shoqet e tyre të klasës si të barabarta me ta, e me respektin dhe dashurinë që ato e meritojnë.

Rasti i ngacmimit seksual të vajzës së mitur nga disa fëmijë poashtu të mitur, shpërfaqë nevojën urgjente të adresimit të çështjes së sigurisë për nxënësit e fëmijët në çdo rrethanë e çdo ambient.

Sot kam biseduar me ministrin e Punëve të Brendshme, z.Xhelal Sveçla dhe ministren e Arsimit, znj.Arbërie Nagavci, të cilët më kanë siguruar që me prioritet dhe profesionalizëm po e trajtojnë rastin në fjalë.

Është përgjegjësi e jona kolektive për të punuar me ngulm që raste të tilla të mos përsëritën. Ne duhet të krijojmë siguri maksimale për vajzat e djemtë tanë, kudo që ndodhen ata: në rrugë, apo në shkollë. Siguria për ta është investim në të ardhmen e tyre.

Siguria, mirëqenia, dhe e drejta e tyre për një fëmijëri të qetë, pa dhunë e në mirëqenie, duhet garantuar në çdo rrethanë dhe me çdo kusht!