Von Cramon kërkon nga Gjermania të bëjë më shumë për liberalizim të vizave me Kosovën

Von Cramon kërkon nga Gjermania të bëjë më shumë për liberalizim të vizave me Kosovën – Lajmet e fundit


Foto: Laura Hasani


Raportuesja për Kosovën në Parlamentin Evropian, Viola von Cramon, në muajin qershor i kishte dërguar një letër sekretarit të shtetit të Gjermanisë në lidhje me liberalizimin e vizave për Kosovën.

Ndërkaq sot, von Cramon ka bërë të ditur se ka marrë përgjigje në letrën e saj.

Siç thotë ajo në Twitter, Sekretari i shtetit gjerman, Stephan Mayer, i ka thënë se disa Shtete Anëtare të BE-së kanë dyshime për procesin e liberalizimit të vizave me Kosovën.

“Mora përgjigje nga sekretari i shtetit të Gjermanisë në lidhje me liberalizimin e vizave të Kosovës ndaj letrës sime në qershor: pranon se disa Shtete Anëtare nuk ishin të kënaqura dhe tani është sërish radha e Komisionit për t’u përgjigjur. Por, pse të humbet më shumë kohë?”, thotë ndër të tjera Von Cramon, transmeton Zeri.info.

Eurodeputetja ka kërkuar nga Gjermania, e cila tashmë kryeson presidencën e Këshillit të BE-së, që të tregojë më shumë lidership për sa i takon liberalizimit të vizave me Kosovën.

“Tri pikat morën përgjigje edhe më parë, dhe asgjë nuk ka ndryshuar me të vërtetë! Është vetëm Këshilli [i Evropës] që fiton kohë duke përdorur dredhi burokratike. Presidenca gjermane duhet të tregojë më shumë lidership, të largojë dyshimet. Kosova meriton regjim pa viza”, ka potencuar eurodeputetja, njëherësh raportuesja për Kosovën në PE, Viola von Cramon.