Zyra e Prokurorit të Specializuar njofton për aksionin rreth arrestimit të Gucatit

Zyra e Prokurorit të Specializuar njofton për aksionin rreth arrestimit të Gucatit – Lajmet e fundit



Zyra e Prokurorit të Specializuar ka njoftuar se Hysni Gucati u arrestua sot në Kosovë nga Zyra e Prokurorit të Specializuar në bazë të një fletarrestimi dhe urdhri për transferim, të lëshuara nga një gjykatës i procedurës paraprake i Dhomave të Specializuara të Kosovës.

“Sipas Ligjit për Dhomat e Specializuara dhe Zyrën e Prokurorit të Specializuar, policia në kuadrin e Zyrës së Prokurorit të Specializuar ka autoritetin dhe përgjegjësinë që të ushtrojë kompetencat që i janë dhënë policë së Kosovës sipas ligjeve të Kosovës. Në Ligjin për Dhomat e Specializuara dhe Zyrën e Prokurorit të Specializuar gjithashtu përcaktohet se personi kundër të cilit Dhomat e Specializuara kanë lëshuar fletarrestim, merret në ndalim”, thuhet në komunikatën për shtyp nga Zyra e Prokurorit të Specializuar.

Po ashtu konfirmohet se ishte Misioni i Bashkimit Evropian për Sundimin e Ligjit në Kosovë (EULEX) që dha mbështetje operative dhe logjistike për ZPS-në, në pajtim me mandatin e vet dhe me legjislacionin e Kosovës. “Edhe Policia e Kosovës (PK) dha mbështetje operative për ZPS-në”, thuhet një njoftimin e Speciales ku bëhet e ditur se informacioni i mëtejshëm do të jepet në kohën e duhur./Zëri